Vom Auto putzn
Wann da letzte Schnee vageht
dann iss langsam nimma z'spät
weus längst scho überfällig wa
dass ma s' Auto putzn tät
Weisse Randl aufn Lack
zeugn nu va koide Zeitn
dass des fürn Rost a Fressn is
siacht ma eh scho va da Weitn
Und plötzlich siacht ma rundherum
alles werkt min Schlauch herum
Tonnen Wasser wern vaspritzt
weu da Dreck net locker sitzt
In de Felgn, in alle Ritzn
siacht ma nu so Batzerl sitzn
und der Unterboden dann
fangt scho fast zan rostn an
Ih hab min Putzn gar koa Freid
ih bewunder ja de Leit
de eana karge Freizeit nutzn
nur zum Blechkarossn putzn
Ih denk da scho wieder weida
wahrscheinlich wa's eh vü gscheida
wann ma nu a bissl wartn
weu dann kummt da Staub van Gartn
Wann de Bam so heftig bliahn
tuats da wieda ois vaschmiern
im Summa iss da Strassnstaub
im Herbst iss dann des bunte Laub
und zwischendurch gibts oft an Reg'n
der is nur für d' Bau'n a Seg'n
Eigentli gibts s'ganze Jahr
koa g'scheite Zeit zan Auto putzn
und jed's mal wieder wird ma klar
ih werd mei Freizeit anders nutzn
Ih find scho was, des wa do g'lacht
bei dem ma sih net dreckig macht
wann's nimma geht, dann kummt der Tag
da fahr ih dann in d' Waschanlag'!
fritz mayer (2012/05)